រដ្ឋមន្ត្រី ថោង ខុន៖ ប្រទេសចិន គឺជាគោលដៅទេសចរណ៍វប្បធម៌ និងជាទី ផ្សារផ្គត់ផ្គង់ទេសចរ ដ៏ធំ សំរាប់បច្ចុប្បន្ននិង អនាគតរបស់ពិភពលោក

(ប៉េកាំង)៖ រដ្ឋមន្ត្រី ថោង ខុន បានលើកឡើងថា ដោយភាពសំបូរបែបនែសក្តានុពលវប្បធម៌ទាំងរូបបិយនិងអរូបិយ នៃប្រទេសចិន និងភាពរីកចំរើនខាងសេដ្ឋកិច្ច និងជីវភាពរស់នៅរបស់ប្រជាជនចិន «ប្រទេសចិន គឺជាគោលដៅទេសចរណ៍វប្បធម៌ និងជាទីផ្សារផ្គត់ផ្គង់ទេសចរដ៏ធំសំរាប់បច្ចុប្បន្ន និងអនាគតរបស់ពិភពលោកទាំងមូល»

ការថ្លែងបែបនេះបានធ្វើឡើងនៅក្នុងកម្មវិធីដោយឡែកមួយទៀត នាឱកាសបើកសន្និសីទប្រតិបត្តិករទេសចរណ៍អាស៊ី (Asia Travel Operators Conference) នៅទីក្រុងប៉កាំង កាលពីរសៀលថ្ងៃទី១៦ ខែឧសភា ឆ្នាំ២០១៩ ដែលមានការចូលរួមពី លោក លីន ជីនចាវ អនុរដ្ឋមន្ត្រីក្រសួងវប្បធម៍ និងទេសចរណ៍ចិន រដ្ឋមន្ត្រី និងថ្នាក់ដឹកនាំវិស័យទេសចរណ៍ និងវប្បធម៌ ព្រមទាំងប្រតិបត្តិករទេសចរណ៍មកបណ្ដាប្រទេសអាស៊ីនានា ប្រមាណ៣០០នាក់។

លោករដ្ឋមន្ត្រីបានលើកឡើងថា ប្រទេសចិន គឺជាក្ដីសង្ឃឹមរបស់យើងទាំងអស់គ្នា ពេលបច្ចុប្បន្ន និងអនាគត។

យោងតាមអង្គការទេសចរណ៍ពិភពលោក ឆ្នាំ២០១៨ ពិភពលោកទាំងមូលបានទទួលទេសចរអន្តរជាតិ ចំនួន១៤០០លាននាក់ កើន៦%។ ដោយឡែកនៅក្នុង ពិធីបើកសន្និសិទ្កិកិច្ចសន្ទនាអរិយធម៌អាស៊ី កាលពីព្រឹកថ្ងៃទី១៥ ឧសភា ២០១៩ ថ្មីៗនេះលោកប្រធានាធិបតី ស៊ី ជិនភីង ក៏បានគូសបញ្ជាក់ផងដែរថា ក្នងឆ្នាំ២០១៨ មានទេសចរជនជាតិចិនដើរចរញទស្សនាក្រៅប្រទេសចំនួន ១៦០លាននាក់ ព្រមជាមួយនោះប្រទេសចិនតែឯង ក៏បានទទួលស្វាគមន៍ទេសចរអន្តរជាតិរហូតដល់ ១៤០លាននាក់ផងដែរ។

បើតាមអង្គការទេសចរពិភពលោក នៅឆ្នាំ២០២០ ពិភពលោករំពឹងទទួលបានទេសចរអន្តរជាតិប្រមាណ១៨០០លាននាក់ ក្នុងនោះទេសចរជនជាតិនឹងកើនដល់ ២០០ លាននាក់។ និន្នាការណ៍នៃកំណើនទេសចរណ៍ ជាពិសេសមកពីប្រទេសចិននេះ ធ្វើឲ្យប្រទេសនានាក្នុងសាកលលោកចាប់ផ្ដើមដាក់ចុះគោលនយោបាយទាក់ទាញទេសចរចិន។

លោក ថោង ខុន ក៏បានជម្រាបជូនអង្គសន្និសីទអំពីបទពិសោធន៍នៅកម្ពុជា ក្នុងការដាក់ចុះយុទ្ធសាស្ត្រទីផ្សារទាក់ទាញទេសចរណ៍ចិន ២០១៦-២០២០ និងការអនុវត្ត សៀវភៅស្ដីស្ដីពី China Ready ដែលផ្ដោតសំខាន់លើការរៀបចំលក្ខណៈសម្បត្តិឆ្លើយតប នឹងសេចក្ដីត្រូវការរបស់ទេសចរចិន ដែលរួមមានការរៀបចំបង្កើតផលិតផលថ្មីៗ ការបណ្ដុះណ្ដាលភាសាចិនដល់បុគ្គលិកប្រើការ និងមគ្គុទ្ទេសក៍ទេសចរណ៍ ការវាយតម្លៃស្ដង់ដាគុណភាព តាមប្រព័ន្ធវាយតម្លៃគុណភាព (China Accreditation System) និងការផ្សព្វផ្សាយនានា។ ជាលទ្ធផល ឆ្នាំ២០១៨ កន្លងទៅទេសចរចិនមកទស្សនាកម្ពុជាមានរហូតដល់ជាង ២លាននាក់លើសការរំពឹងទុក។

លោករដ្ឋមន្ត្រីក៏បានលើកថា បច្ចុប្បន្នក្រោមគំនិតផ្ដួចផ្ដើម ខ្សែក្រវ៉ាត់ និងវិថី ព្រមទាំងស្មារតីនៃសហគមន៍វាសនារួមកិច្ចសហប្រតិបត្តិការលើវិស័យទេសចរណ៍ ត្រូវបានពង្រឹង និងពង្រីកមួយកម្រិតថែមទៀត ហើយដែលប្រទេសតាមវិថីសូត្រនឹងមានឱកាសជំរុញដៃគូរពាណិជ្ចកម្ម និងទេសចរណ៍ផងដែរ។ សន្និសីទប្រតិបត្តិករទេសចរណ៍អាស៊ី ដែលរៀបចំឡើងនាពេលនេះ នឹងជួយជំរុញឲ្យផ្នែកឯកជនក្នុងវិស័យទេសចរណ៍ជួបជុំផ្លាស់ប្ដូរយោបល់ និងបង្កើតទំនាក់ទំនងធុរកិច្ច សំដៅជំរុញការអភិវឌ្ឍវិស័យទេសចរណ៍ នាពេលបច្ចុប្បន្ន ក៏ដូចជាអនាគត ដោយចាប់យកកាលានុវត្តភាពនៃភាពរីកចម្រើនរបស់ប្រទេសចិន៕

ផ្តល់សិទ្ធិដោយ៖ Freshnews